‘O frautista de Hamelin’ é o título da obra que o Grupo de Teatro Down Compostela leva ensaiando dende finais do pasado ano e que tiña previsto estrear o vindeiro mes de xuño, ata que chegou a pandemia da covid-19.
O coronavirus obrigou tamén a mudar o traballo e as previsión do Grupo de Teatro Down Compostela, no que participan unha vintena de persoas con discapacidade, dirixidas por Lucas Herrador.
Ademais peche do Servizo de Promoción da Autonomía Persoal de DOWN COMPOSTELA, seguindo as indicacións das autoridades competentes, o grupo de teatro tivo que suspender os ensaios presenciais… Pero non deixou de traballar.
DOWN COMPOSTELA volveu utilizar as novas tecnoloxías para que os actores e actrices puidesen seguir demostrando a súa valía. Así, de acordo co director, Lucas Herrador, o grupo de teatro comezou a facer ensaios virtuais da obra na que están a traballar. A través da plataforma Zoom, celebráronse xa dous ensaios virtuais da obra de teatro. Unha iniciativa que foi moi ven acollida polo elenco de actores e actrices.
Duodécima obra
‘O frautista de Hamelin’ é a duodécima obra que o Grupo de Teatro Down Compostela espera estrear en canto o permita a situación sanitaria. Ata o de agora xa puxo en escena ‘Todos os camiños levan a Santiago’ (Teatro Principal, 2019); ‘La mansión de José Cruz’ (2018); ‘Arturo, Arthur, Artur’ (Salón Teatro, 2017) – Premio do Público na Mostra de Teatro de Rianxo de ese mesmo ano– , ‘Búscame a este tipo’ (Salón Teatro, 2016), ‘Solo ante la Peligros’ (Salón Teatro, 2015), ‘Las pruebas de Hércules’ (Salón Teatro e Casa de Cultura de Milladoiro, 2014), ‘Bodas de sangre’ (Salón Teatro e Casa de Cultura de Milladoiro, 2013), ‘Fuenteovejuna’ (Salón Teatro, 2012), ‘Romeo e Julieta’ (Sala Nasa, 2011), ‘Esopo y sus fábulas’ (Sala Nasa, 2010) e ‘Alicia en el país de las maravillas’ (Auditorio de Galicia, 2009).
